香港特奧會40年有姚明 張建宗話「高不可攀」

【明報專訊】勞工及福利局長張建宗原來都幾關心體育消息，佢噚日喺網誌話，大家近期可能關心歐洲國家盃球賽，或者熱議巴西奧運嘅火炬手，但好少人會留意到，香港特殊奧運會喺上星期一舉行咗40周年啟動禮，仲有退役籃球明星姚明專程來港主禮，目的係鼓勵智障人士發揮潛能，推動社會共融。


張建宗話香港早於1975年已扮演先鋒角色，係整個東亞區首個參與特殊奧林匹克運動嘅經濟體，來年香港將派出47名運動員參與3月喺奧地利舉行嘅2017特殊奧林匹克冬季世界比賽。張局長又話特奧推廣嘅理念其實係一個推動關愛共融嘅運動。


張局長講政府點樣幫弱勢社群，好似喺2016/17年度，香港展能精英運動員基金為香港智障人士體育協會提供約190萬元資助，基金亦分別為協會嘅37名殘疾運動員提供超過91萬元生活津貼及為兩名退役殘疾運動員提供超過12萬元就業輔助津貼。


不過，相比政府一擲10億元搞一帶一路獎學金，張局長可能要再努力啲去爭取資源。


圖為勞福局長張建宗（前右二）日前同國際特殊奧林匹克代表團成員及特奧大使姚明（後）會面，張局長話姚明對佢而言真係有啲「高不可攀」嘅感覺。