星戰登陸迪士尼樂園

【明報專訊】香港嘅星球大戰迷等咗近一個月，香港迪士尼樂園已經將「明日世界」改裝，加入唔少星戰元素。原先嘅「幸會史迪仔」改頭換面變成星戰「指揮站」，市民入去裏面就可以見到Ｗookiee機師Chewbacca，一向鍾意自拍嘅財政司長曾俊華噚日參加揭幕禮時提醒大家，如果Chewbacca發出怪聲，都只係想提大家迪士尼係唔可以用自拍棍影相，引嚟全場笑聲。


另外，「飛越太空山」就變成「星戰極速穿梭」，成個過山車以電影《星球大戰：原力覺醒》嘅場景做主題。Emily噚日率先試玩，一坐上列車，就會聽到星球大戰主題曲，令Emily以為自己加入咗反抗軍，準備要同帝國軍開戰。不過坐上過山車，發現其實路軌無變，如果以為會刺激咗嘅市民可能就要失望嘞。


港人拉隊買飛有優惠

一眾星戰迷如果想入園見下黑武士、白兵，最好就拉多兩三個朋友，因為樂園推出「拉大隊」優惠，港人拎住張身分證，由即日起至下月15日，就可以用1302元（81折）買3張門票，或者1616元（75折）買4張門票。