田二少靠阿哥捱過金融風暴

【明報專訊】自由黨榮譽主席田北俊同新民黨副主席田北辰雖然係親兄弟，不過性格、政見都唔係幾相同，有時更加會因此互相開火。不過細佬田北辰噚日接受商台節目《雲常開》訪問，就講到同阿哥嘅兄弟情。田二少話，兩兄弟都「好有個性、好有主見」，細細個兩個人已暗中較勁，長大之後，兩人都因為個性強而唔易喺原則上妥協。


兄弟理念衝突 老竇都擺唔平

田二少話，佢喺美國大學畢業後，留喺當地發展，做打工皇帝，之後阿哥接手爸爸（田元灝）盤生意，邀請佢返香港一齊打天下。不過，兩兄弟喺合作上面又出咗問題。阿哥負責做廠，佢做零售，彼此喺策略、理念都有矛盾同衝突，連爸爸想擺平都唔成功，結果雙方同意分拆，佢就出去自立門戶。


唔好睇兩兄弟好似水火不容，田北辰話，「老實講，我阿哥救咗我好多次，如果佢有咩需要，我會毫不猶豫去幫佢，不過佢好少要我幫，因為佢太叻」。佢喺節目憶述，97年金融風暴自己跌入人生最低潮，當時「衰到貼地」，最後亦係搵最親嘅哥哥同朋友幫手，先可以起死回生。