新聞類別
副刊
詳情#
【明報專訊】端午節各黨派都出去派吓糉、出席龍舟活動應節，而民建聯主席李慧琼（Starry）就趁端午節抽水，喺facebook上載題為《團結一心奪錦標》嘅動畫短片，描述3隊健兒比併龍舟，分別有著藍衫嘅「團結隊」、金髮藍眼嘅「番民隊」，同著黑衫戴黑眼鏡嘅「勇武隊」。片段中，番民隊一開始就偷步，勇武隊喺賽事中途就向團結隊「掟糉」，番民隊就話「佢哋掟糉，我哋睇熱鬧」，不過團結隊最終都後來居上贏出。Starry口中嘅3支隊伍係諷刺邊啲人，大家可以心領神會。
四正楊岳橋入街市學包糉
Starry黨友、副主席張國鈞噚日就去派曲奇餅等禮品，同南區黨友喺區內擺街站同攤位遊戲，放埋張國鈞宣傳直幡，寫明「即like有獎」，吸引唔少人去攞獎品。
至於公民黨楊岳橋就喺facebook話，前日去咗大埔嘅街市跟檔販學包糉，仲話睇住兩個前輩示範，佢自己都包咗兩隻，烚咗嚟食，無穿無爛仲好好食！不過楊岳橋繼續貪靚愛形象，入街市包糉都係著住恤衫打呔。佢嘅黨友郭家麒醫生，噚日就同大家推介早幾日喺長洲買返嚟嘅「灰水糉」，話比較健康，叫大家去開長洲可以幫襯吓。郭醫生仲提提大家， 食完糉後要做吓運動燒脂呀﹗
留言 (0)
