財爺「力爭上游」照片獲祝福

【明報專訊】全港多個地方噚日趁端午節舉辦龍舟賽，唔少高官都現身捧場，噚日身分仍然係署理特首嘅財政司長曾俊華，就去咗西貢「特能共融龍舟賽」擔任頒獎嘉賓。曾俊華出席活動之後，以「賽龍奪錦，力爭上游」為題喺facebook專頁上載咗幾張活動照，當中一張係佢戴住墨鏡、喺一幅飄揚緊嘅「力爭上游」旗幟隔籬向水上健兒揮手。外界一直有傳曾俊華係下任特首熱門人選，唔知呢張力爭上游相，係咪意有所指呢？


財爺呢個力爭上游post，4個鐘頭已有逾1.2萬個like，包括公民黨梁家傑，有網民就留言﹕「祝早日奪錦！」不過，財爺噚日到場嗰陣，有社民連成員帶埋貼上特首梁振英同退休警司朱經緯相片嘅道具「賤糉」向佢抗議，要求盡快起訴涉嫌喺佔領期間打傷途人嘅朱經緯，但財爺無接到示威物品，由佢嘅政治助理接收，示威者之後亦和平散去。


民記兩副主席向劉江華請願

另邊廂，民政事務局長劉江華噚日去沙田睇龍舟賽，民建聯副主席周浩鼎、彭長緯同多個成員喺場外請願，要求政府就大廈工程圍標問題成立大廈維修管理局同修改法例，仲要向業主提供更多支援。周浩鼎之後將「爭取過程」拍片放上網。身為民建聯前副主席嘅劉江華，遇到兩個現任副主席遞交請願信都有啲尷尬，不過都願意接信。