性別歧視情景題 譚志源話唔識答

【明報專訊】平機會早前為一男子入稟控告一間娛樂場所，男士入場費比女士高，結果勝訴，認為該場所有歧視，呢單案件引起唔少爭議，皆因唔少酒吧同娛樂場所都有Ladies Night嘅女士優惠。噚日立法會就有多名議員關注，仲提出多個情景要求政府解釋係咪有歧視，搞到政制及內地事務局長譚志源都口啞啞，表明「唔識答」投降。


自由黨飲食界議員張宇人提出有關口頭質詢，多名議員乘機提問。工聯會黃國健話擔心平機會矯枉過正，無視男女之間生理差別，仲問現時要求商場提升女廁廁格比例係咪又違法？譚志源承認難答，但相信有兩個原因，包括反對歧視，以及為有需要人士設立特別設施，可以係兩全其美做法。


經民聯石禮謙更話由細到大都被教導要lady first，係咪有歧視？人民力量陳志全就話，其實現時打扮男性化嘅女性都享用唔到女士優惠，因為被視為同男士「爭食」，咁又係咪歧視？譚志源直言唔識答，提議佢稍後直接問平機會主席陳章明。


民建聯陳鑑林則批評今次案例僵化，質疑每年都有三八婦女節但無男士節，都係犯法。譚志源無奈咁話面對議員質詢呢20分鐘好難捱，男士節就應該叫勞福局長張建宗諗諗喎。


另香港酒吧業協會同陳章明會面，表達判決對業界影響嚴重，有份去嘅議員謝偉俊引述平機會承諾會向酒吧業界舉行講解會，說明除非酒吧有不合理或與推廣促銷不相稱嘅性別歧視意圖，否則一般以提供優惠為主要目的嘅營商、銷售手法，都唔會被平機會提訴訟。