林鄭訪美談一國兩制﹕自由受保障

【明報專訊】特首梁振英（CY）及政務司長林鄭月娥同一時間外訪，CY噚日喺法國圖盧茲，林鄭就現身美國華盛頓。CY去圖盧茲主要係考察航天航空產業經驗，噚日下晝去咗法國國立民用航空學院參觀，呢間係法國唯一專門教授航空相關學科嘅大學，亦係歐洲最具規模嘅航空學兼民用航空大學。CY話期望透過參觀可為香港籌辦嘅民航學院帶來啟示。


林鄭喺美國行程緊湊，包括拜會美國眾議院議長辦公室參謀長David Hoppe同眾議院議長辦公室國家安全顧問Jonathan W Burks，又同美國參議院對外事務委員會東亞、太平洋和國際網絡安全政策小組主席加德納，同埋參議院對外事務委員會高級成員Benjamin Cardin會面，詳細討論香港最新政治及經濟發展。


林鄭向美國人解釋，「一國兩制」一直喺香港運作良好，個人嘅基本權利及自由亦受《基本法》保障。