律師會換屆 副會長蘇紹聰坐正

【明報專訊】香港律師會噚日選出新一屆正副會長，律師會副會長蘇紹聰（圖）將會接替熊運信擔任會長；現任副會長彭韻僖就連任，理事黎雅明就「升呢」當選副會長。


蘇紹聰係孖士打律師行合伙人，主理商業、物業、誹謗同埋媒體有關嘅訴訟工作。蘇紹聰由2005年開始做律師會理事。佢不時都會就社會法律議題表達意見，就好似今年2月佢喺律師會傳媒茶敘都有回應佔領運動同旺角大衝突嘅問題，佢當時強調相信法庭判決公正。


新任副會長嘅黎雅明身兼平等機會委員會增選委員，佢都係2005年加入律師會理事會，平日主理伊斯蘭金融、土地、信託同公證等訴訟。連任嘅彭韻僖由2014年開始擔任副會長，擅長民事訴訟、商業同埋物業管理嘅法律。