周六投入服務 新機場巴士 手機可叉電

【明報專訊】龍運巴士新一批機場巴士星期六（11日）就會投入服務，首批會行走北區嘅A43及A43P線，稍後會擴大到其他區。九巴facebook噚日就上載短片介紹新車，仲安排咗區議員試坐。呢批新車特別之處，除咗車上面有USB充電插頭，仲好貼心咁準備咗巨型保溫箱，據試坐過嘅區議員劉國勳話，呢個設備方便旅客放外地帶返香港嘅三文魚等冷藏食品。劉國勳話噚日試車時，巴士公司利用保溫箱冷藏飲品招呼佢哋，效果都OK，但到正式投入運作時效用有幾大就仲要觀察吓。


保溫箱存放冷藏手信

劉國勳都讚呢批龍運豪華巴士ADL Enviro500 MMC Facelift Coach車廂較寬敞，行車穩定，仲試過用車上Wi-Fi服務，但佢話龍運採用指定網絡商，CSL或1010用戶免費任用，其他人就免費半粒鐘。至於USB充電插頭只設喺車身兩邊，唔係坐靠窗嘅乘客要幫手機充電，電線可能要跨過身邊嘅乘客。


龍運巴士又介紹，巴士大玻璃採用低透光玻璃，怕曬嘅女士都無咁易曬黑，而車廂椅背有雜誌袋，設計類似飛機座位。