被轟美化馬戲班班主 港台馴獸師節目惹投訴

【明報專訊】港台節目質素多有保證，但上星期六出街嘅節目就惹嚟投訴。NPV非牟利獸醫服務協會執行主席麥志豪噚日喺facebook發文，批評《中國故事 II》其中一集節目《末代馴獸師》，將內地安徽馬戲班班主拍成「重情重義愛動物的好人」，並呼籲網民向通訊事務管理局投訴，帖文出咗5個鐘，就有超過130人轉發，同埋近500個「嬲嬲」。


監製：呈現行業現况 無預設立場

Emily噚日就問咗《中國故事 II》節目監製方曉山，方曉山話港台按一貫編採方針製作節目，節目呈現咗馴獸師行業現况、馴獸師嘅處境，港台無任何預設立場，明白唔同觀眾對節目會有唔同感受，未必每個人都認同，強調紀錄片純粹係鋪陳事實，唔係為某一方講說話。


麥志豪嘅帖文話，馬戲班嘅式微係「求之不得的好事」，但導演用咗感性角度拍攝，將班主拍攝成「重情重義愛動物的好人」，強調片中嘅小熊會用兩隻腳企起身，係因為班主用鐵鏈吊起小熊，令佢哋被迫用兩腳站立，「小熊為何會像人兩腳站起來跟你玩耍？？因為小時候被你用鐵鏈吊起，被逼用兩腳站立，班主你自己不記得了嗎？？」佢已經就節目向通訊事務管理局投訴，亦叫大家去港台網站重溫呢集節目，由大家評吓道理。