有話說﹕趁夏天三伏 天灸健體

【明報專訊】最近天氣轉熱，屋企兩個細路嘅濕疹、鼻敏感輪住發作，搞到Mama頭都大埋。有同學仔媽咪建議試下做天灸，仲講到天灸好神奇，能醫百病咁；另一邊廂，奶奶近排五十肩翻發，又有親戚叫佢做天灸，呢個親戚係親身用家，之前膝頭鬼死咁痛，但近年做完幾次天炙之後，就逐漸好轉，家已經無晒事。


Mama對呢種療法無乜認識，但上網睇過，原來醫管局及私家醫院轄下嘅中醫藥部門都有天灸做，咁就肯定唔係「邪術」啦，但細路哥啱唔啱做、點做法呢？Mama就真係唔知喇，唯有請教相熟嘅註冊中醫許懿清。


中醫防病措施 概念似打疫苗

許醫師話，天灸係一種中醫傳統療法，每年兩度嘅天炙治療，概念就好似西醫嘅接種疫苗咁，係防病措施，對鼻敏感、濕疹、皮膚過敏、哮喘、慢性咳嗽、體虛怕冷、易感冒、慢性胃病、關節炎等療效最顯著。


不過，許醫師補充，天灸唔係話你鍾意幾時做就幾時做，而係要喺夏季及冬季特定時間去做㗎！夏季係做三伏天灸，即係一年中最酷熱嘅日子去做；冬天就做三九天灸，會選擇最陰寒嘅日子去做。


至於2016三伏天灸最佳嘅日子，原來係7月17日（初伏）、7月27日（中伏）及8月16日（末伏）。許醫師解釋，呢幾日正係肺經氣血運行最旺盛嘅時刻，此時用溫熱性質嘅藥物，貼敷喺特定嘅穴位表面，借助藥物對穴位嘅刺激，就可以激發經絡、調整氣血，達到冬病夏治嘅預防目的。


穴位貼藥 3歲已可做

問咗咁耐，Mama其實最關心適唔適合細路哥做。許醫師就叫Mama大可放心，天灸既唔使食藥，亦唔需要打針，藥物貼喺穴位大概一兩個鐘就可拆除，一啲痛都無，對改善小朋友嘅身體狀况又有明顯幫助，所以只要小朋友無特殊病患，足三歲就已經可以做。


不過許醫師都提醒，不論係三伏天灸或三九天灸，一旦開始療程，應該堅持連續做三年以上，咁先可以加強及鞏固療效。而貼藥後三天內，亦要禁食海鮮、蝦、牛肉、鴨、鵝、花生及其他煎炸食物，以免影響治療效果。