鍾樹根：明張目膽俾你燉冬菇 hashtag「正！」

【明報專訊】近期熱中喺facebook呃like嘅民建聯鍾樹根（樹根），噚日繼續發功自嘲，上載幾張喺柴灣向長者派冬菇嘅相片，仲寫上「明張目膽益街坊之俾你燉冬菇」，仲特別標籤「#燉冬菇 #正！」，結果一日內吸到幾百個like，有人留言「根哥好嘢，支持根哥重返議會」，亦有網民形容樹根係畀「李」燉冬菇，唔知係咪暗示緊民建聯主席李慧琼呢？

與黃台仰駁火：我做青年工作你未出世

「要本土不要分離」嘅樹根，噚日出席港台節目《城市論壇》時，同本土民主前線發言人黃台仰多次駁火，樹根批評泛民同新世代出現鴻溝，黃台仰就反問對方「你又唔係泛民，又唔係年輕人，點解你會知？」樹根聞言立即反駁，用手指住黃台仰話，「我做青年工作嗰時你都未出世呀」，結果主持人都要加把嘴，問樹根會唔會就係因為佢呢種心態，令年輕人唔開心。


樹根早前揚言考慮退黨，但「分離」之說令佢不斷被抽水。樹根喺節目解釋對本土嘅睇法時，黃台仰就讀出歌手王傑嘅經典金曲《幾分傷心幾分痴》：「分離從來不易，這個你我早已知」，引嚟部分現場觀眾一陣笑聲。