未有人表態選特首 唐唐話不尋常

【明報專訊】上屆特首選舉敗於梁振英（CY）手上嘅前政務司長唐英年（圖），噚日上港台節目《議事論事》，題目係近期熱論嘅特首選舉。雖然近期政圈不斷傳出政務司長林鄭月娥、財政司長曾俊華係熱門人選，不過兩人都無明顯表露心迹，唐唐就話，現時都未有人表態有意選特首係「不尋常現象」，認為「愈拖延，只會愈有利特首連任」。


唐唐自爆當年選舉策略錯誤，選前半年先辭任公職，準備時間太短。佢話籌備特首選舉需要好多時間，而時任行會召集人梁振英就有幾年時間準備，傳媒都唔會用顯微鏡望實佢一舉一動。


雖然唐唐表明無意再落場跑馬仔，不過佢就開出下屆特首三大要求，包括有公信力、有管治威信及向市民問責。咁CY係咪符合要求？唐唐無繼續講落去，但就談及落敗時曾祝CY政通人和，直言覺得CY做得不足。佢又話，多聽CY講一國，但少提兩制，希望佢可以畀市民多啲信心，保證維護一國兩制完整。


唐唐仲教CY，話被問到支持港足定國足，應該答「我係中國人，但我支持港隊」。塞翁失馬，焉知非福，唐唐話特首選舉係人生磨練，事後同家人更團結，好友圈子都大咗，出街仲有好多市民同自己揮手同打招呼