鼠戰中環障礙項目玩「篤背脊」

【明報專訊】「鼠戰中環」今年嚟到第11屆，大會宣布賽事喺10月16日舉行，活動籌得善款會捐畀慈善機構「思健」，喺中港兩地推廣精神健康。今年除咗一直受歡迎嘅障礙比賽之外，大會仲特別舉辦一系列親子工作坊，畀家長同小朋友享受親子時光。


年年都有參賽者「扮鬼扮馬周圍竄」挑戰障礙項目，佢哋要完成8個賽段嘅障礙關卡。今年嘅障礙項目模擬打工仔喺辦公室忙碌工作嘅一日，好似第四關「暗箭難防 沉著應對」中，參賽者要對住隊友背上嘅標靶射箭，唔知係咪講緊辦公室入面成日有人「篤背脊」呢？


比賽要等到10月，但影相就唔使等咁耐，市民即日起可以去交易廣場中央大廳，同虛擬「鼠大班」合照，同場仲有圖片展，回顧過去10年嘅精彩時刻，展期到6月21日。另外，大會喺7月會舉辦親子工作坊，家長可以同小朋友玩3D打印、整花燈。