樹根爆紅 短片一夜40萬點擊 自稱與黃容根加埋「黐孖根」

【明報專訊】主張「要本土 不要分離」嘅民建聯鍾樹根（樹根），因為被黨拒絕排喺名單首位出戰立法會港島直選，講明考慮同民建聯「分離」；近日玩facebook突然玩到出神入化嘅樹根，前晚隨即喺fb上載短片表明極度遺憾云云，呢單新聞引起好多網民注意，雖然樹根嘅fb專頁只有近1.3萬人like，但條片擺上網未夠24個鐘，已經有逾40萬次點擊，好威水，唔少網民仲表明支持佢獨立出選。不過樹根似乎都好清醒，話係咪退黨有多方面考慮，又話要睇清楚網民係咪真心支持佢喎。


民建聯主席李慧琼（Starry）噚日接受電台訪問，形容「政治有時好殘忍」，樹根喺立法會被問到點睇對方講法時，就形容政治「對任何人都會殘忍，（睇吓）幾時落到佢身上㗎啫」。樹根呢一番話，即時令在場記者譁然，佢隨即聲稱唔係講緊Starry，而係講緊政治殘忍現時落到自己身上，希望自己係最後一個。


獲不止一個政黨招手

政界有傳民建聯黃容根同樣有意退黨，參選漁農界挑戰黨友何俊賢，樹根就笑言，佢同黃容根兩個加埋就係「黐孖根」！

樹根噚日出席另一個電台節目時強調，會考慮獨立出選嘅勝算、資源調配同影響，又承認有不止一個建制政黨向佢招手，但無透露更多詳情。