兩個「正義聯盟黨」法院外對陣 邊撐警邊罵李偲嫣

【明報專訊】萬眾期待嘅七警案噚日開審，晨咁早去到法庭嘅，除咗要攞籌聽審嘅Emily同一班行家，仲有兩批同樣舉住「正義聯盟黨」旗嘅撐警人士。點解話係兩批？事關佢哋雖然旗號一樣，但就分別企喺法院門口兩邊嘅示威區，似乎唔多似係「黨友」。當七警行入法院時，佢哋都仲會一齊嗌吓口號，但當七警入咗去之後，一邊嘅示威者就將口號由「支持七警」變成「打倒李偲嫣」，鬧爆呢個「正義聯盟黨」創黨主席「唔係女神係女神棍」、「專呃人錢」、「老千」等。


李陣營派《被誣陷真相》

噚日偲嫣嗰邊就無開咪回應，迅速執嘢走人，不過就派咗一份17頁厚嘅《李偲嫣被誣陷「騙財虧空」真相大披露》畀Emily，不過當中有12頁其實都係佢參與「社會服務工作」嘅「威水史」。


「正義聯盟黨」內訌唔係噚日先出現。今年3月時聲稱係該黨副主席嘅蔡克健同岑浩賓，曾經開記者會指控偲嫣虧空公款同欠債不還，要開除偲嫣黨主席同黨籍。偲嫣第二日開記者會反擊，話自己無欠人咁多錢，強調佢先係 「正義聯盟有限公司」大股東，堅持自己依然係「正義聯盟黨」主席。究竟兩個「正義聯盟黨」邊個真邊個假？Emily就真係望唔透喇。