林超英慳電過黃錦星

【明報專訊】環境局長黃錦星同前天文台長林超英都係環保之人，上周四局長喺社交網站公開自己屋企今年2月份嘅電費單，需繳交91元電費，只用咗104度電，耗電再見新低；佢仲分享慳電心得，話屋企換咗部新嘅變頻雪櫃，所以仲有得慳。事隔4日，林超英隔空接招，喺社交網站貼文，同環境局長比慳電，話屋企最近半年用電較低嘅紀錄係兩個月176度，即係一個月88度，「要追的是星爺」。


林超英仲話，政府嘅電費津貼剛好喺展示帳單嘅月份用晒，即係星爺啲津貼早過佢用完，證明星爺屋企耗電較多，暗示自己連贏兩仗。林超英話有人以為佢生活艱苦，夜晚唔開燈，佢強調自己「生活質素十分好，不只晚上有開燈，而且我家電器不比一般家庭少，只不過我家奉行：應用則用，不用則關，盡量避免浪費」。