財爺唔認同「一代不如一代」

【明報專訊】財爺曾俊華噚日刊出第400篇網誌，今次就大談青年人追夢。佢話早排接受《明報》校園記者訪問，又去埋《少年滋味》電影首影禮，乘機同年輕人傾偈。佢話上一代同下一代喺唔同環境成長，所謂「世代矛盾」恐怕永遠都存在，但唔認同「一代不如一代」呢種說法，因為「不同世代之間各有特質，各有擅長之處，實在難以比較，也不必比較」。


鼓勵趁年輕逐夢 不枉青春

財爺話鍾意同後生仔傾偈，話佢哋笑容總係充滿朝氣。佢提到早前出席張經緯導演拍攝嘅《少年滋味》，仲幫手宣傳吓套戲，話片中有9個年輕人嘅故事，其中佢對戲中Angel嘅故事印象深刻，指具音樂才華嘅Angel今年16歲，喺學校擔任風紀隊長，面對老師期望同友儕壓力，不時左右為難；佢雖然熱愛音樂、表演，現實卻無奈地「隨波逐流」，將精力都花喺功課同補習班之上。


財爺話，無論邊個世代嘅人都擁有自己夢想，而大部分人因為種種原因，要將夢想放下。不過，財爺話或者應該慶幸新一代有更大嘅空間去追尋夢想，鼓勵大家趁年輕大膽逐夢，咁先不枉青春。佢仲話，「各位追夢的年輕人，為了美夢成真你可以去到幾盡？」