湯家驊街站宣傳 賀民主思路1周年

【明報專訊】標榜走中間路線嘅民主思路即將成立滿一周年，佢哋會舉行一連串活動慶祝，打頭陣就係落區宣傳。噚日民主思路召集人湯家驊（Ronny）聯同3個考慮出戰立法會選舉嘅成員，一齊去勻港九新界擺街站宣傳。


3個民主思路政策實驗室主任劉培榮、黃梓謙同麥嘉晉，分別有意出選新東、港島同九西。佢哋同Ronny一齊去太古康山、黃埔同大圍宣傳。民主思路亦會開展喺巴士同的士車身嘅廣告宣傳，以「重整議會，再爭普選」為口號。呢句口號真係選舉味濃，民主思路稍後會舉辦主題為「香港想像」嘅研討會。Ronny日前都喺facebook話需要大量義工同捐款，呼籲支持者幫手。民主思路希望可以籌得400萬元作為選舉經費。