中大與國際高手合研重力波

【明報專訊】大家仲記唔記得重力波（Gravitational Wave）呢？今年2月雷射干涉儀重力波觀測站（LIGO）宣布成功探測兩個黑洞喺13億年前合併時所產生嘅重力波，引證愛因斯坦喺100年前提出廣義相對論中嘅其中一個重要預言，有助進一步了解宇宙起源。LIGO雲集世界上逾1000個科學家，而香港都有一個科學家參與其中，佢就係中大物理系研究助理教授黎冠峰（圖）喇，中大最近仲同LIGO簽署合作備忘錄，成為現時唯一一所同LIGO合作嘅香港院校。


作為LIGO合作組成員，中大嘅研究人員不但可以拎到LIGO探測器同埋處女座重力波探測器（Virgo）嘅數據，仲可以派研究人員去同各國專家參與操作探測器，今年就有一名本科生可以跟黎教授去參與LIGO嘅研究工作，Emily希望不久將來會有更多發現。