謝偉俊促廢強積金 研全退保

【明報專訊】立法會議員謝偉俊（Paul）早幾日喺facebook話支持取消強積金、應該研究全民退保，但唔夠一個鐘就刪除咗個post，令大家都質疑阿Paul究竟係咩立場，噚日立法會通過強積金修訂條例草案，規範強積金管理費上限，阿Paul就喺fb出post，話支持任何有效減低強積金收費嘅修訂，仲向所有議員發信，邀請大家一齊支持廢除強積金。


指基金去年蝕逾500億

阿Paul話，即使立法會通過所有修訂，亦難阻基金收費大幅蠶食強積金供款，過去15年基金管理收費近800億，上年蝕咗500幾億，表現唔理想，理應廢除。佢畀議員嘅信件列出廢除強積金有咩好處，包括免除每年近100億基金管理費、避免一旦政府喺全民退休保障計劃爭議中再蹉跎10至15年，市民又要畀多成1000億管理費，亦解釋強積金對冲爭議、釋放6000億供款，增加經濟體系流轉資金等。


阿Paul話，應該要廢除強積金先行止蝕，無咗呢個支柱，亦可令政府更大壓力，咁先可以令政府認真研究全民退保喎。