葛珮帆揸枴杖 慶祝結婚周年

【明報專訊】民建聯葛珮帆（EQ）都算黑仔，繼去年10月喺立法會女廁仆低受傷，上星期日又仆親，搞到左腳腳眼拗柴，懷疑韌帶撕裂，家行路要用柺杖。


EQ上次因為立法會女廁爆咗水管水浸，佢唔為意積水跌傷手，今次仲離奇，佢星期日去將軍澳單車館出席活動，都好小心著住有防滑鞋底嘅鞋，理論上應該唔易跌低，但估唔到因為樓梯級都有防滑凹凸設計，結果鞋底啜住梯級，搞到佢失平衡拗柴。佢當時痛一痛唔為意咁傷，仲企咗幾個鐘參加活動，但夜晚左腳眼就腫咗。


EQ呢幾日都返立法會開會，噚日仲要去覆診，但噚晚仲有一個重要晚餐要出席，就係約咗老公食飯慶祝結婚16周年，但佢講笑話，拎柺杖唔係好浪漫，而佢又要戒口，本身又食素，食物嘅選擇唔多！不過，EQ都話好感激老公支持，話做議員丈夫唔容易，感激丈夫體諒。