副局講漏兩字 記者白行一趟

【明報專訊】近日城大屋頂倒塌事件揭發綠化工程嘅潛在危險，政府都要即時巡查轄下建築物嘅綠化屋頂，不過可能忙中有亂，噚日朝早代發展局長陳茂波出席立法會嘅副局長馬紹祥，就其中一座同城大運動中心一樣嘅金屬屋頂建築物「屏山天水圍游泳池」，擺烏龍讀成「天水圍游泳池」，雖然只係「食咗」兩個字，不過Emily嘅攝影師同事即刻就去咗「天水圍游泳池」影吓個屋頂（圖），點知說好的綠化屋頂就見唔到，淨係見到一大塊綠色塗層，草都無一條。


Emily即刻問政府，下晝4點幾政府新聞處先出稿修訂番，其實局長係講緊「屏山天水圍游泳池」。可憐Emily同事出返市區後，再折返天水圍影多次，遊咗大半日車河。