車身印「要本土 不要分離」 鍾樹根宣傳戰車被抄牌

【明報專訊】近日有消息傳出，民建聯港島區立法會議員鍾樹根可能無得出選9月立法會，皆因民建聯喺港島只會出一隊，令樹根或成為犧牲品，但消息無礙樹根落區宣傳。繼喺港島多處掛起大型橫額話「月是故鄉明」後，樹根噚日宣傳佢架本土宣傳戰車，但就出師不利，未向傳媒介紹，先被抄牌。


人力職員打電話投訴

樹根噚日喺立法會外嘅添美道為佢架「月是故鄉明」宣傳車搞啟動儀式，下晝停咗喺路邊，結果被警察抄牌。樹根形容係「政治問題」，「上面有好多人打咗十幾次電話去投訴」，但佢有少少唔忿氣話「呢度又無雙黃線」，引述警員指「人哋打得多，我都要抄，無辦法啦」！至於張「牛肉乾」邊個找數，佢就話「呢個係廣告公司嘅事，唔關我事」。Emily聽聞，投訴佢嘅係人民力量陳偉業嘅職員。


嚟緊一個月巡港島各區

宣傳車印上大個樹根嘜頭，又有「月是故鄉明」、「要本土 不要分離」字樣，車尾有部電視播放唔同宣傳片，嚟緊一個月會巡迴港島各區。樹根呢個本土宣傳相信花費不菲，但佢唔肯透露具體價錢，只係話「係人哋畀一個好特價我哋，暫時要保密」，部分係佢自己出，部分由民建聯資助。樹根話香港社會太撕裂，港獨利用本土名義「遮掩分裂行為」，又話全國人大委員長張德江指呢啲「係非法行為」，故佢要以正視聽，強調本土係人之常情，又話宣傳攻勢同9月立法會選舉無關。