周浩鼎話黨友北上好有紀律

【明報專訊】身兼民建聯成員嘅大律師馬恩國，日前以中澳法學交流基金會主席身分帶團北上見京官，但有隨團成員爆出「夜蒲」醜聞，涉事團員先後辭去基金會職務。民建聯副主席周浩鼎（Holden）噚日同傳媒茶敘，話唔評論個別事件，強調民建聯好有紀律，如果去內地出席活動都會整體行動，行程後一係開會、一係瞓覺休息。不過另一名副主席彭長緯就劃清界線，話馬恩國唔係以民建聯身分帶團咁話。


彭長緯﹕馬恩國非以民記身分帶團

盛傳9月出戰立法會「超級區議會」議席嘅Holden，噚日約傳媒講吓近况，順便探聽行家對佢近期嘅宣傳攻勢有咩意見，不過Holden對係咪參選仍然不置可否。公民黨楊岳橋早前喺社交媒體推出短片系列，受到唔少網民歡迎；同樣係政黨新生代嘅Holden亦不甘示弱，近期開始拍「鼎訊」短片探討地區議題，佢噚日預告未來會搞更多噱頭，仲笑言可能會著古裝粉墨登場，拍片做「鼎俠」。


外界有傳Holden選超區會專攻新界選民，佢噚日就大講新界民生議題，例如大嶼山發展、地區蠓患等等，亦話嚟緊會主打年輕夫婦同就業議題，爭取年輕人支持。