【明報專訊】上月有6歲男童感染甲型流感死亡，Mama睇到新聞片段，見到男童父母開記者會哭訴，指醫院延誤診治，睇到佢哋嗰份喪子之痛真係唔做過父母都唔會明，令Mama都喊埋一份。除咗傷心，呢件事當然令好多父母都突然關心番子女嘅健康，本來大家平時以為傷風感冒食啲藥就搞掂，點知原來嚴重時係會死人，點會唔人心惶惶？
今年流感肆虐，睇番資料，截至5月18日，衛生防護中心共錄得27宗兒童流感相關的嚴重併發症/死亡個案，當中包括3宗年齡小於18歲嘅兒童死亡個案。咁如果我仔女打乞嚏流鼻水發燒，我點知佢係咪患上流感，係咪要即刻入院檢查呢？Mama擔心到第一時間打電話畀香港中文大學兒科學系教授韓錦倫，問吓大教授，流感同傷風感冒嘅分別，同埋預防方法。
韓醫生話流感係一種高傳染性病毒引起嘅呼吸道感染疾病，病毒分甲、乙、丙型，患者會突然有3至4日持續高燒，仲會出現喉嚨痛、咳嗽、周身骨痛同疲倦等徵狀，如果家中有患者，其他家庭成員都好容易會被傳染，病毒亦會走入身體各部位，嚴重的話會引起唔同併發症，如腦炎、中耳炎等。但係傷風感冒其實係一個好含糊嘅字眼，西醫一般稱為急性上呼吸道病毒感染，感染部位主要係鼻同喉嚨，雖然患者有可能出現發燒、流鼻水同喉嚨痛等徵狀，但病况一般較輕微。
11月至翌年4月 流感高峰期
韓醫生話睇番過去數字，以全港兒童人數來計，其實因流感出現併發症風險的比例並唔算好高，所以佢安慰Mama同其他家長唔使過分恐慌；佢又形容流感病毒係百變嘅，會變出唔同嘅品種，但好彩係佢點變都好，我哋預測到佢爆發高峰期係每年11月至翌年3、4月，而6、7月會有一個小陽春，根據佢哋嘅行蹤，大人同小朋友就可以依時接種季節性流感疫苗去預防。「不過睇番資料，本港人士接種流感疫苗嘅數字都係偏低，建議大家每年都要去打預防針，以保健康。」
新聞類別
副刊
詳情#
留言 (0)
