研紓東涌塞車 周浩鼎貼2萬元請專家

【明報專訊】民建聯周浩鼎本身係離島區議員，早前參加立法會新東補選，少咗時間留喺東涌，曾被網民質疑只顧立法會選舉，唔理區會選民。唔知阿鼎係咪想證明自己毋忘東涌，佢自掏銀包2萬元，請咗專家幫手設計一個紓緩東涌市中心交匯處一帶塞車嘅方案，噚日喺離島區議會交通及運輸委員會提出。


阿鼎同Emily講，曾同運輸署等部門提出過要處理東涌鐵路站一帶擠塞問題，但一直未見改善，而佢本身唔係交通專家，咁不如搵專家幫手度吓改善方案，仲話花咗2萬元。Emily話民建聯果然實力雄厚，但阿鼎話今次唔係黨出錢，係自掏荷包。其實平時繁忙時間，東涌鐵路站外有唔少汽車上落客，阿鼎就提出修改路段增加私家車落點，減少私家車同巴士爭路，長遠就重新規劃該路段行車線，改善車輛進出安排，認為咁有助減少擠塞。阿鼎話運輸署人員當然唔會即時話照做，但見到佢咁認真，都拎個方案返去研究吓。