黃錦星帶行山 後生顏汶羽﹕行到幾乎暈

【明報專訊】行山人士喺假期好容易喺山嶺見到環境局長黃錦星嘅蹤影，噚日局長就同政助區詠芷，帶青年民建聯成員行山，介紹香港郊外保育工作，參加嘅有青民主席顏汶羽、民建聯副主席周浩鼎等。今次佢哋揀咗被譽為全球最受歡迎20條行山徑嘅麥理浩徑，局長幫佢哋揀咗最易行嘅路段。顏汶羽話，局長邊行邊提醒佢哋要「山野無痕」，垃圾自己帶走，自己帶水同食物，仲教埋沿途嘅植物品種。


30℃行麥理浩徑五段

局長揀嘅係麥徑五段，沿途風景優美，仲有馬騮睇，而局長等人亦帶埋「大嘥鬼」公仔郊遊，沿途幫大嘥鬼留影，又話「自己水壺自己帶，唔用即棄樽裝水」。雖然話係最輕易嘅路段，但都由朝早9點行到下晝1點，噚日天氣都幾熱，有成30℃。顏汶羽就讚局長健步如飛，汗都少流，相反佢自己雖然算係年輕力壯，但行到幾乎無氣暈低，其間要坐低休息10分鐘回氣，自嘲唔行唔知身體差。


講開行山，局長喺facebook轉載咗政府新聞網介紹漁護署技工嘅短片。漁護署話，萬物有時，樹木總會老化，而漁護署工人會將老化樹木同枯木製成小擺設，放喺郊野公園供遊人享用，製成品各式各樣，既有外形別致嘅長椅，亦有指示牌、地標、動物雕塑等。佢哋亦會將枯木堆放喺樹林內腐化，釋出養分回歸大自然，既可美化郊野，又可善用大自然資源，達至循環再用。