議員偕外傭睇展覽 讚貢獻大

【明報專訊】香港現時有超過30萬名外籍家庭傭工，佢哋嘅工作環境一直受社會關注，鰂魚涌「Para Site」藝術場地近期舉辦題為《工餘》嘅展覽，透過相片、影片同裝置藝術，探討香港同其他地方嘅勞工、種族同移民問題，噚日就邀請到民主黨主席劉慧卿（卿姐）同工黨張超雄，陪同10幾個外傭一齊參觀。


《工餘》最矚目嘅展品，來自菲律賓攝影師Bacani嘅攝影作品，Bacani曾經喺香港做咗近10年外傭，但日常工作無埋沒佢嘅攝影天賦，Bacani曾用鏡頭記錄佔領運動，其作品更曾獲《紐約時報》同CNN等國際媒體報道。展覽喺周日（29日）結束，公眾可以喺星期三至日免費參觀。


卿姐話外傭對香港有重要貢獻，但政府對外傭支援不足，早前發生嘅虐傭案更加突顯問題，所以希望政府提供更多渠道處理外傭投訴。張超雄就形容外傭喺照顧長幼起重要角色，值得更多回報。