警fb謝市民諒解 反吸逾萬「嬲嬲」

【明報專訊】全國人大委員長張德江噚日結束3日訪港之旅，相信連日來時刻戒備嘅警員都可以鬆一口氣，堅守灣仔防線嘅水馬都可以逐步搬走喇。張德江中午登機前同港人揮手，警方facebook轉個頭喺下晝1點幾就發布帖子，除咗宣布有關道路解封，並「衷心感謝所有參與行動的警務人員，積極作出配合的各方持份者，以及每一位市民給予的支持及諒解」。不過此文一出，截至噚晚10點，8個幾鐘頭內已有逾1萬個「嬲嬲」，「讚好」嘅就有1800個。


政府新聞網喺fb上載嘅張德江送機短片都唔「輸蝕」，152個網民表達心情，「嬲嬲」佔咗93個。噚日網上旅遊公司Expedia都不忘抽吓水，喺fb出帖話送機有離別、有傷感、有無奈、有不捨，但有時都係開心嘅。弦外之音？讀者自行領會吧。