37歲佳佳白內障 唔建議做手術

【明報專訊】海洋公園辦熊貓藝術品展覽

為咗宣揚保育大熊貓，海洋公園今日至5月29日同四川省林業廳合辦「四川周」，其間嘅《熊貓亦藝術》會展出20幾件由中國、西班牙同法國5名藝術家以大熊貓為主題嘅作品。園內嘅大熊貓近况又點？海洋公園陸生動物部高級館長祝效忠噚日透露，熊貓佳佳有白內障，出現過可致永久失明嘅晶狀體移位，經治療後晶狀體回復返原來位置，但再移位嘅機率幾高。


37歲嘅佳佳相等於人類111歲，年紀咁大，做眼部手術又得唔得？祝效忠就唔建議喇，因為佳佳本身有高血壓，麻醉亦有風險，現時主要幫佢滴眼藥水。至於盈盈同樂樂，上月嘅交配期結束咗，但就失望而回。海洋公園之後再幫盈盈做咗兩次人工授精，如成功受孕，最快要今年7月底先會有懷孕迹象。