送機贈相簿 「歡迎再來」 CY緊握張德江手5秒

【明報專訊】主管港澳事務嘅全國人大委員長張德江，噚日結束3日訪港行程，佢中午同特首梁振英（CY）坐同一部房車抵達機場，甫落車就轉身向現場傳媒揮手，但未有發表講話。佢喺CY陪同下，先接受兩個送機小朋友嘅花束，其後同3名司長林鄭月娥、曾俊華、袁國強，立法會主席曾鈺成、行會召集人林煥光及內地駐港人員逐一握手。


張講咗三聲「謝謝」

張德江之後同CY兩次握手，第一次先同CY講三聲「謝謝」，唔通因為好重要，所以張德江要講3次？CY其後將一本紅色封面相簿遞畀張德江，話「過去兩天拍了照片，請你留個念」，張德江就回答「我上飛機就看」，兩人再度握手。不過，張德江想轉身離開時，CY未放手，並補多句「感謝你，歡迎再來」，張德江就話「你們也辛苦了」，結果CY成功緊握委員長隻手5秒。


林鄭月娥近期對係咪參選下屆特首回應有所不同，話12、13個月後先答呢條問題。佢噚日同張德江道別時一直露齒微笑，至見到CY送相簿畀委員長，林鄭就短暫收起笑容，再少少斜望CY，唔知林鄭當時諗緊咩呢？張德江最後同中聯辦主任張曉明握手，並喺踏入飛機前向在場者同傳媒再次揮手道別，為香港之旅畫上句號。