批記者立會食飯 馬逢國﹕想改善採訪安排

【明報專訊】立法會嘅功能組別議員應為業界利益發聲，不過作為傳媒行業代表嘅「體育、演藝、文化及出版界」議員馬逢國（圖），早前被指喺立法會行政管理委員會閉門會議上，投訴記者喺立法會走廊食飯唔恰當，批評記者搞到議會好似「大牌檔」咁，好大陣味，「成何體統」。馬逢國噚日終於喺立法會正式回應事件，佢承認會上有提過記者喺立法會食飯「唔係太理想，亦唔健康、唔衛生、唔好睇」；但佢強調出發點係希望改善採訪安排，等大家食飯食得舒服喎。


身為傳媒界代表，發表批評記者喺立會食飯嘅言論係咪唔恰當？馬逢國話「呢個唔係言論，係一個內部討論……我只係提一個意見去改善」，仲話叫記者思考點解一啲唔應該報道嘅事會被報道出嚟，又強調無意侮辱記者。


指「咪兜」危險 倡無線咪取代

馬逢國話佢有提出建議，認為可以喺立法會議事廳外安裝閉路電視，轉播到記者室，記者可以一邊喺記者室食飯，一邊睇住外面情况，有事先行出嚟採訪。馬逢國又話，立法會大廳外「咪兜」附近地上有大量電線，會對經過嘅人包括議員「構成危險」，自己曾差啲「拗柴」。佢仲話建議用無線咪，由一支咪接收聲音並與多部攝錄機共享。