民記開P賀69歲 曾鈺成生日唔使「拉布」最開心

【明報專訊】立法會主席曾鈺成噚日紅光滿面，朝早去咗機場接人大委員長張德江飛機，一眾黨友之後喺辦事處為曾主席搞咗個溫馨小型生日會，搵咗一批民建聯議員及黨友同佢切生日蛋糕，同佢講Happy Birthday賀69歲牛一。曾主席愛徒李慧琼就喺facebook上載生日會實况，仲話曾主席好開心，而今年生日最開心就係唔使喺「拉布」中度過。


十大熟悉政治人物 排第4

曾主席人氣知名度近排高企，港大民意研究計劃喺5月3至5日做民調，以熟悉程度排列十大最熟悉政治人物，曾主席排第4位。10名政治人物依次係梁振英、梁國雄、林鄭月娥、曾鈺成、黃毓民、葉劉淑儀、曾俊華、曾蔭權、董建華及高永文。上榜政治人物全部都能夠蟬聯十大榜。