《囧報》加盟記協周年宴

【明報專訊】香港記者協會噚晚舉行48周年晚宴，筵開超過60席，邀請咗香港大學校長馬斐森做主禮嘉賓。港大呢兩年成為輿論風眼，2014年上任嘅馬斐森講起做港大校長日子，有唔少感觸，其中3個日子令佢最難忘，包括自己履新當日、佔中期間去金鐘探學生，同埋學生衝擊校委會。履新當日點解咁難忘？馬斐森話，為咗呢日致辭，佢苦練廣東話，但竟然跟錯馬來西亞老師，令自己廣東話帶咗其他口音，搞到要立即糾正番。佢仲即場示範履新嗰日嘅發言，依然好流利，贏得現場一片掌聲。


馬斐森跟錯大馬老師學粵語

講到香港年輕人，馬斐森話，佢所認識嘅港大學生聰明有禮、尊重制度，唔係如外界所講咁粗暴、反叛。佢話，對港大學生非常自豪，唔會放棄佢哋。


岑倚蘭籲老闆善待記者

今年記協晚會用「真黑白」做主題，記協主席岑倚蘭致辭嗰陣話，當下世代假話太多，顛倒黑白，所以「真」就特別彌足珍貴。佢呼籲傳媒老闆善待記者，新聞界亦要「從良」，跟從良知同良心。


每年一度嘅記協晚宴都有唔少政商界人士買枱支持，全場嘅紅白酒繼續由唐英年贊助。不過今年就多咗一家新傳媒《囧報》，原來係《導火新聞線》劇組，包括男神王宗堯、楊淇等買枱撐場。