周六晚搶包山 設小組觀察天氣

【明報專訊】長洲太平清醮壓軸項目搶包山決賽周日（15日）凌晨零時舉行，康文署舊年就因雷暴同大雨取消賽事，今年為免引致混亂，設立咗緊急應變小組留意天氣，最遲喺周六（14日）晚上11點會公布賽事係咪如期舉行。


決賽開始前，即周六晚11點半，先有開幕儀式為決賽倒數，踏正12點，9男3女參賽者就會衝上包山塔比試。包山塔上有9000個平安包，包括900個9分包、1700個3分包及6400個1分包，參賽者要喺3分鐘內搶包。當局夜晚10點開始派發1650張門票，先到先得，10點半可入場霸位，但要留意當晚6點開始，中環同長洲有人流管制，當局估計周六當日有6萬人次入長洲睇飄色巡遊同搶包山比賽。新渡輪同巴士公司都會喺比賽完結後加開特別班次疏導人流。