楊岳橋又收帛金? 原來係真．捐款

【明報專訊】公民黨楊岳橋（Alvin Yeung）早前喺facebook大爆自己收到「帛金」，被人咒「直達地獄」，「百無禁忌」嘅佢就以幽默化解，仲話要送番啲「This AY」糖回禮；佢仲打蛇隨棍上，發起捐款回糖嘅網上籌款活動。不過無諗到事隔幾日，佢又收到疑似「帛金」，連岳少助理都嚇親，不過睇真啲，原來係100蚊嘅真．捐款。岳少喺facebook話「爭啲畀人呃到」，大讚呢位仁兄鬼馬。


新東補選花逾250萬

其實再多「帛金」都多多益善，事關立法會選舉好燒錢。睇番岳少向選舉事務處提交嘅開支申報，佢喺今年2月新東補選豪花咗逾250萬元，冠絕咁多候選人，遠高於民建聯周浩鼎嘅151萬同埋本土民主前線梁天琦嘅75萬元。不過，佢喺選舉中獲得36.3萬捐款，其中六成來自1000蚊以下嘅小額捐助。