公職王陳智思：不選特首 局長都唔考慮

【明報專訊】特首選舉仲有唔夠一年就舉行，好快又到「跑馬仔」階段，呢段時間大家都好關心究竟邊個有興趣出選，即將卸任活化歷史建築諮詢委員會主席嘅陳智思（Bernard）日前就保育問題，接受Emily訪問，Emily當然唔會錯過問呢位「公職王」會唔會出選啦，Bernard即刻表明「梗係唔會」，仲話做局長都唔考慮，因為要放棄晒所有嘢。


要先顧住家族生意

咁究竟係乜嘢令Bernard個心繫住呢？佢就話首要條件係要先顧住啲家族生意，「好似家咁嘅模式，我唔mind，我擺七成時間喺公家，都仲有三成（打理家族生意）」。


計一計數，Bernard除咗係行會成員、人大代表，做保育工作以外，仲係司法人員薪俸及服務條件常務委員會主席、香港社會服務聯會主席、活化已修復堆填區資助計劃督導委員會主席同埋降低食物中鹽和糖委員會主席。


話無關政治氣候

佢話唔介意做呢種「兼職」，但如果做局長、特首呢類全職就唔考慮喇，「（同政治氣候有冇關係？）冇關係，首要係考慮會唔會顧唔到家族生意，呢樣（因素）我唔放棄，其他（因素）點會考慮？」