有話說﹕報暑期班 讓孩子「話事」

【明報專訊】話咁快又五月喇，仲有兩個月就放暑假。呢排一班家長坐埋，話題總離不開報暑期班，大家對於報啲乜、報幾多，都有唔同睇法。家長A話，暑假最好用嚟幫小朋友溫故知新，所以報咗中文閱讀寫作班、英語會話班、珠心算班。當然，平日上開嘅補習班、鋼琴班仍然要繼續啦！家長B就話，其實報乜班都無所謂，最緊要係密集式，最理想係上完一堂接另一堂，總之唔好畀小朋友咁多時間逗留喺屋企，否則就只會打機、睇電視。


Mama算係異數，早幾日同兩個細路傾開，問佢哋暑假想學啲乜，兩個異口同聲話要學魔術、學整麵包，仲話學完魔術之後，會返屋企表演畀Mama同嗲啲睇，又話會整腸仔包畀我哋食，聽到Mama心都甜埋。另外，兩個細路今年忽然好想學游水，就係咁，Mama就幫佢哋報咗呢三個暑期班。點知成班家長都鬧Mama，話學游水還可以，但做乜畀佢哋學魔術、整麵包呢啲無謂嘢，浪費晒個暑假！吓，唔通Mama真係做錯決定？好彩香港中華基督教青年會協調幹事許繹標撐Mama，話選擇正確。


多留空檔 反增孩子專注力

許sir話，佢絕對唔贊成家長將暑期時間表排到密麻麻，咁對細路嘅情緒，以及課堂參與程度都有好大影響；相反，應該畀多啲空檔時間小朋友休息吓，瞓覺又好，去公園玩又好，輕鬆吓，反而有助提升專注力。


至於揀乜嘢暑期活動，許sir就建議，如果小朋友已經有足夠表達能力的話，家長不妨放手，交畀仔女做決定。佢話，好多時家長以為學畫畫好，就走去幫小朋友報畫畫班，殊不知個細路根本一啲都唔鍾意，勉強去做，只會帶來反效果，所以，報乜暑期班，細路嘅興趣係最關鍵。


好多家長都擔心，由得細路自己揀，就一定係揀晒啲純粹玩樂嘅活動，咁咪乜都學唔到？從事社工多年嘅許sir就話，呢方面，家長大可放心。以佢機構為例，即使係魔術班、烹飪班，社工、導師喺課程設計上，其實都花咗唔少心思。舉例，導師可能會刻意安排一啲失敗經驗畀小朋友，唔係做一次就會成功，讓小朋友知道，失敗咗、做錯咗唔緊要，可以再嘗試，最終都會成功，從而提升佢哋嘅抗逆力；另外，課堂係小組形式，小朋友又學習到點同其他人相處、合作，懂得要守規矩、要跟別人分享物資等等，呢啲都係好寶貴嘅成長經驗。


當然，小朋友揀暑期活動時，家長都可以從旁畀意見，除咗上述着重群育嘅興趣班，亦可以鼓勵佢哋報一啲體育班，例如球類、田徑、水上活動；至於智育，即係含些少學術成分嘅暑期班，亦可以加插其中。