與CY唔對嘴 財爺探曹星如 話運動商機大

【明報專訊】梁振英（CY）未選特首、仲係行會成員時，常撰文評政事，觀點同當時嘅特首曾蔭權唔同；財爺曾俊華近年都好敢言，噚日喺網誌文章〈體育經濟學〉同CY「唱反調」。財爺話上周四晚去拳館探望「神奇小子」曹星如（Rex），話體育運動創造龐大商機及生意額，「除了運動員本身吸金力強大，整條產業鏈也能帶動廣告宣傳、賽事統籌、體育用品，甚至飲食、旅遊、酒店等等，可以產生巨大的經濟效益……不論是班費、電視轉播權、商業贊助、商品營銷等都是天文數字」。


大家記得CY喺2014年講過，體育界等「沒有任何經濟貢獻」，但仍可參與特首提名；財爺就似乎不敢苟同，佢以Rex為例，「當晚參觀Rex集訓的拳館，現場有不少男女白領在學拳或健身，相信當中不少人是慕Rex的名而來學拳，這亦反映一個知名運動員，可以帶動的商業利益」。


話周六捧Rex場

近期多次提起英超冠軍球隊李斯特城嘅財爺又話，據統計喺上一個球季，英超球隊總收入高達破紀錄嘅34億鎊（約377億港元），稅前盈利達13億港元。剛贏得聯賽冠軍嘅李斯特城，據報道，估計從賽事獎金、門票收益、廣告贊助以及下季參與歐洲賽事嘅出場費等，可得到1.5億鎊（16.6億港元）收入。李斯特城呢個英國中部小城亦多咗人認識，話當地民眾對社區嘅歸屬感和凝聚力，價值更加難以計量。


講番Rex，周六佢會喺灣仔會展打第19場職業拳賽，大家都希望佢可以創下19場不敗紀錄，而財爺就呼籲大家屆時捧場。Rex就話，同屬武林中人嘅財爺為佢打氣，感覺好開心，又話付出嘅努力能夠帶動到拳擊運動，令呢項冷門運動有更多人留意，一路以來付出嘅辛苦都係值得。