趙國雄私己錢買餅卡冧股東

【明報專訊】上市公司開股東會，派禮品、食品同贈品，不時出現「僧多粥少」嘅情况。噚日泓富產業（0808）喺同系公司置富產業（0778）嘅紅磡置富都會商場入面，召開股東周年大會，連續3年喺同一會場開股東會。噚日好多股東出席，搞到唔派點心，轉派餅卡都唔夠派。搞到啲股東係咁車輪轉追問主席趙國雄（圖）。趙生講，噚日出席人數衆多，因此唯有會後先派餅卡。若果唔夠派，佢會私人貼錢寄番餅卡畀股東。趙講完呢句，股東條氣即刻順番晒，亦有人即時起身離場，先攞餅卡走人是也。


趙國雄會後又話，有股東持股好耐，難得出席支持捧場，但佢又記得有股東講過以前見到派剩點心盒覺得浪費，若果要滿足咁多股東同朋友，要公司出錢又唔多好，諗過不如自己花啲錢，幫襯番租客聖安娜嘅餅店買餅卡，支持租客之餘又唔使畀股東話浪費資源，個個都開心，佢仍然笑笑口講：「仲畀得起嘅。」


email: piano@mingpao.com

[小琴密語]