楊岳橋「This AY糖」回贈寄帛金者

【明報專訊】公民黨楊岳橋前日喺facebook大爆有人寄咗11蚊「帛金」畀佢，真係百無禁忌，佢今日就準備咗糖「回禮」。楊岳橋話好多網民留言提佢回番粒糖畀人，所以準備咗包「This AY」糖，叫寄信畀佢嗰位仁兄行過立法會就上去拎，「利利市市」咁話。楊岳橋準備嘅回禮糖隻色就係公民黨黨徽嘅顏色，上面有佢英文名嘅簡寫「AY」（Alvin Yeung）。


根據習俗，每封吉儀入面都會有一粒糖、毛巾或紙巾，同一個1蚊硬幣，放糖嘅用意係希望減輕親友嘅苦，有叫人節哀順變嘅意思；紙巾就畀親人抹眼淚；而嗰1蚊就係表示參加喪禮嘅謝意。


事緣日前立法會審議《2016年撥款條例草案》時，民建聯蔣麗芸詛咒建議削減消防處開支嘅人民力量陳志全「殉職」，楊岳橋話議事堂百無禁忌，仲叫蔣麗芸畀帛金，點知佢就真係收到帛金，係寄去立法會辦公室畀佢嘅。楊岳橋仲提醒，其實寄現金係犯法嘅，建議對方下次都係寄支票啦，抬頭寫公民黨有限公司就得。