畀「體雕大狀」嚇親 林作無意選九西

【明報專訊】港姐冠軍麥明詩男友林作（圖）話題多多，上年參選黃大仙區議會，同譚香文對撼賺盡知名度，最近加入民主思路青年團，仲積極幫手擺街站派傳單，被視為9月立法會選舉出戰九龍西嘅熱門人選。不過林作就同Emily話自己無打算出選，都唔會考慮向民主思路自薦出選。


有港姐撐腰，又係大律師嘅林作贏在起跑線，不過佢話政圈好多人都係大狀，水平兩極，笑言畀參加新東補選嘅「體雕大狀」梁思豪嚇親，擔心佢已搞衰大狀個朵。林作話自己26歲太後生，「未夠成熟」，大律師工作又啱啱起步，想專心揼石仔發展事業先。


雖然口講無意，但林作話中都留有一線。佢話如果民主思路想5區都派人，喺缺人嘅情况下邀請自己，或會考慮參選。佢仲好密切留意立會選舉動態，對於有傳媒製作立法會選舉專頁上，將佢列為九西潛在候選人，仲有埋各項評分，佢都會同黨友分數比較吓。