成功組黨先會退黨 田少歡迎侯強回歸

【明報專訊】上水鄉委會主席侯志強（侯強）早前大張旗鼓搞組黨，仲好決絕交咗退黨信畀自由黨榮譽主席田北俊，不過臨門一腳組黨未成，咁退出自由黨仲係咪成事？原來侯強早就留有一着，田少噚日透露，呢封退黨信其實未生效，因為裏面有前提，係組黨成功先會生效。唔知係咪預料組黨未必一帆風順，田少話封信一直擺喺枱頭未處理，歡迎侯強回心轉意，留喺自由黨繼續貢獻。佢又話自由黨北區樁腳唔多，如果鄉事訴求合情合理，自由黨一定力撐，講到咁，似乎有心挽留侯強喎。


而自由黨最近亦人氣爆棚，喺港大民研調查中仲榮登十大政團榜首，不過田少就好謙虛，話其實立法會喺市民心目中做得好差，無一個政黨取得過50分，話仲要繼續努力做好啲。