財爺網誌談Made in Hong Kong

【明報專訊】財爺曾俊華網誌轉口味，唔講香港人身分，講番經濟，噚日就大談再工業化，要做「Made in Hong Kong」。


發展高科技高智能製造業

財爺話香港要踏上「再工業化」之路，當然唔係要將勞動密集嘅低技術製造業搬返香港，而係要結合高端科技，發展智能化、高技術嘅製造業。佢話香港喺機械人技術、醫療儀器、資訊科技與物聯網穿戴裝置等方面，都有唔錯嘅基礎同發展潛力。佢又推銷自己政績，話今年嘅《財政預算案》重點之一，包括計劃注資20億元成立「院校中游研發計劃」，資助大學做更多應用研究；亦會增加「現金回贈計劃」嘅資助金額，鼓勵業界投資於研發。


佢話要用科技帶動經濟，且一直認為當中嘅關鍵係「應用」。就算擁有最先進嘅科技作為工具，仍然要識得將佢結合實際環境同自身優勢，先能夠達到推動產業發展嘅目標。佢又話，喺政府大力推動下，唔少海外嘅初創企業同人才被吸引嚟香港，佢哋帶住尚屬雛形嘅產品，甚或是「一條好橋」落戶香港，以香港作為進一步研發同測試嘅基地，再配合內地生產線，進軍亞洲以至世界各地市場。