受訪避談象牙商名單 陸恭蕙揮手叫停機

【明報專訊】官員遇到唔想答嘅記者問題，有時會唔回應，有時就「無補充」。不過，環境局副局長陸恭蕙之前接受英國廣播公司（BBC）有關香港象牙貿易訪問，畀外籍記者問到點解當局將合法象牙貿易商嘅名單保密，陸恭蕙話唔太肯定點答條問題，之後突然揮手要求停機，同記者講「我哋可唔可以中止？」結果記者形容陸恭蕙嘅緘默「奇怪」，報道出街後亦引起網上熱議。


事緣報道講買賣象牙喺中港兩地係合法行為，但兩地對象牙嘅需求令非法象牙交易增加，BBC記者追問陸恭蕙當局保密名單嘅原因，陸恭蕙就揮手要求停機，但呢個舉動最終都被拍低同播埋出街。


陸恭蕙噚日同Emily解釋事件，承認自己當時嘅舉動「做得唔好」，佢補充，因為處理名單係漁護署嘅工作，佢自己唔清楚，所以當時同記者講「唔好意思，我答唔到你」，又提出搵合適部門回應問題，其實同日下晝已經安排咗漁護署同記者會面咁話。