李梓敬否認「棄立選換經民聯區選讓路」

【明報專訊】自由黨新星李梓敬上年區議會選舉喺深水埗又一村贏出，不過近日有報道話李梓敬曾經同經民聯交換條件，以自己唔出選立法會選舉，換取經民聯喺區選讓路。李梓敬噚日出嚟否認同澄清，形容報道係對誠信同人格嘅「謀殺」，強調自己從來無同經民聯就住讓路與否聯絡或者協定，話法例唔容許就參唔參選交換條件。政界一直有傳李梓敬可能喺9月出選九龍西，不過佢噚日非常口密，話參唔參選要等黨決定。


另邊廂，身為九龍西立法會議員嘅經民聯梁美芬，噚日出席傳媒茶敘就話，無同李梓敬傾過立會選舉問題。各路潛在候選人近期陸續浮面，「積極考慮」競逐連任嘅佢就分析選情，話9月一定「風起雲湧」，每多一張名單就好似掟石頭落水，引起嘅漣漪對所有人都有影響。