挑戰平機會 自由黨堅持搞Ladies Night

【明報專訊】平機會早排幫一個市民入稟法院，控告旺角某夜場男女收費有別，涉嫌違反《性別歧視條例》，仲贏埋官司。自由黨青年團主席李梓敬對呢個裁決好唔滿意，本來上星期五舉行Ladies Night活動抗議，但同日下午接到酒吧通知，提供唔到場地，令活動取消。


不過，自由黨冇放棄，搵咗另一間酒吧，再接再厲舉辦活動，自由黨青年團今晚會再搞Ladies Night，挑戰平機會決定，活動會喺中環安慶台Play酒吧舉行，男士收160蚊，女士免費，活動9點開始。不過最終活動會唔會好似黎明咁臨時取消，就要睇吓酒吧夠唔夠膽喇。唔知上星期講明已經向老婆攞正牌去酒吧嘅自由黨立法會議員田北俊，今晚又會唔會出現呢？