民建聯母親節橫額印Happy Father's Day 社區主任：要着重埋父親節

【明報專訊】民建聯嘅橫額不時都會被眼利網民發現寫錯字，近日facebook專頁「傑出關公系列」貼出一張民建聯社區主任柯倩儀的街頭橫額，內容祝賀街坊母親節快樂，但英文就寫「Happy Father's Day」。唔少網民形容係「傑出文盲系列」，柯倩儀向Emily表示，橫額並唔係印錯。


上年母親節，民建聯立法會議員葛珮帆同成員張子賢，喺橫額上祝天下父親母親節快樂，網民分享、笑爆之後，民建聯曾經解釋係同事忙中有錯。


網民：或暗中支持多元成家

事隔一年，網民發現柯倩儀嘅橫額犯相似錯誤，有網民認為民建聯暗中或支持多元成家，直指「阿媽唔一定係女人」。


不過，柯倩儀向Emily話橫額唔係印錯，話橫額上面嘅公仔有爸爸、媽媽同小孩，配上「母親節快樂，Happy Father's Day」標語，係希望大家慶祝母親節嘅同時，亦要着重父親節。


Emily問咁樣係咪會有一款橫額係「父親節快樂Happy Mother's Day」，佢就話可考慮，仲多謝網民對佢咁關注。