「嘥拉布嘥 拉布拉布嘥」 王國興唱二創歌技「驚」四座

【明報專訊】由3個中學生演繹嘅數學歌《Side Angle Side》，近期掀起熱潮，噚日立法會審議財政預算案，工聯會王國興喺會上就發揮一貫創意，為呢首歌重新填詞，憑歌寄意諷刺拉布議員。首歌點唱呢？正如原曲一樣，歌詞非常簡單，就係「拉布嘥拉布，嘥嘥嘥，嘥拉布嘥，拉布拉布嘥」。


王國興「唱」嘅時候舉住歌詞紙，不過似照讀多啲，佢都話自己五音不全，「唔能夠有譜譜落去」，希望同學唔好介意佢二次創作喎。佢話希望用呢首改編歌，諷刺立法會被拉布綁架同浪費嘅「不堪情况」，批評拉布令好多弱勢社群得唔到及時援助。


「紀念碑」轉放曾鈺成畫像旁

另邊廂，社民連梁國雄（長毛）噚日開會就帶埋一個近兩米高嘅巨型紙製「香港工傷死難者紀念碑」入會議廳，希望紀念工傷死者。原本長毛將道具碑放喺會議廳都相安無事，但唔夠一陣，代主席梁君彥就以安全為由叫秘書處職員移走，長毛一度同梁君彥爭論，批評佢因為有工商界背景而做呢個決定，最終長毛將道具碑放番喺會議廳外、主席曾鈺成畫像嘅旁邊。